Haldið verður tveggja daga námskeið í Jákvæðum aga dagana 16.-17. mars næstkomandi á Hótel Laugarbakka í Miðfirði.  Leiðbeinendur verða Aníta Jónsdóttir og Ágúst Jakobsson.  Leiðbeinendur hafa hlotið vottun sem slíkir (Certified Positive Discipline Trainer).

Þarna er um að ræða nokkuð stíft tveggja daga námskeið þar sem farið er í grunnþætti og grunnæfingar sem tilheyra stefnunni með það að markmiði að þátttakendur öðlist aukinn skilning á henni og öryggi í notkun Jákvæðs aga í sínum störfum. Námskeiðið er viðurkennt af Positive Discipline Association í Bandaríkjunum og munu þátttakendur fá viðurkenningu að því loknu.  Rétt er að taka fram að þar sem þetta er svokallað „grunnnámskeið“ (Core workshop) gætu þeir sem hafa áður setið námskeið eða fengið fræðslu í Jákvæðum aga upplifað einhverjar endurtekningar á þessu námskeiði, en á hinn bóginn er alltaf gagnlegt að fara aftur í gegnum grunnæfingar og taka þátt í umræðum um grunnþætti í stefnunni, auk þess sem námskeiðið er formlega viðurkennt og gefur því tækifæri til framhaldsnáms fyrir þá sem vilja.

Námskeiðið verður haldið á Hótel Laugarbakka í Miðfirði og stendur frá kl. 9-17 mánudaginn 16. mars og þriðjudaginn 17. mars 2020. 

Kostnaður er sem hér segir:
Gisting og fæði (þrír í herbergi):  29.890
Gisting og fæði (tveir í herbergi): 31.590
Gisting og fæði (einn í herbergi): 38.890
(Innifalið: Gisting með morgunverði frá sunnudagskvöldi til þriðjudags, hádegisverðir, kaffi og meðlæti og þriggja rétta kvöldverður á mánudagskvöldinu) 

Námskeiðsgjald (leiðbeinendur, fundaraðstaða, námskeiðsgögn, gjald til Positive Discipline Association, viðurkenningarskjöl o.fl.): kr. 45.000

Samtals miðað við þrjá í herbergi:  74.890
Samtals miðað við tvo í herbergi:  76.590
Samtals miðað við einn í herbergi: 83.890

Kostnaðurinn er styrkhæfur frá Vonarsjóði vegna grunnskólans og Vísindasjóði vegna leikskólans. Gert er ráð fyrir að gisting og fæði sé greitt á staðnum en reikningar fyrir námskeiðsgjaldinu verði sendir þátttakendum þegar skráningu er lokið.  Það væri sannarlega bæði gaman og gagnlegt ef þarna gæti ca 20-25 manna hópur hist, fræðst í sameiningu og bæst við hóp lykilaðila í innleiðingu Jákvæðs aga hér á landi.   

Skráning fer fram hér:

https://goo.gl/forms/2vM5u5BZTvYGULNe2